2/5

Kelpnúðlusúpa

Færsla skrifuð 2. maí 2016

Miso súpa var algeng hversdagsmáltíð hjá okkur mæðgum hér áður, þegar sú yngri var barn og sú eldri á kafi í makróbíótískum fræðum. Hjá okkur er því alltaf ákveðin nostalgía fólgin í því að nota miso í matargerð, enda er bragðið af miso ákaflega notarlegt. Miso er gerjaður kraftur, sem er mikið notaður í hefðbundinni japanskri matargerð, bæði sem grunnur í súpur og sem krydd í aðra rétti.

Í þetta sinn langar okkur að deila með ykkur uppskrift að kelpnúðlusúpu með miso og Thai ívafi. Grunnurinn er miso-seyði sem við söxum fullt fullt af ferskum kryddjurtum út í, ásamt blaðlauk, fallegu grænmeti og spírum. Að lokum bætast við gott avókadó og kelpnúðlur til að bíta í.

Mikið var seyðið fallegt í pottinum með blaðlauk og kryddjurtum. Það býr einhver heillandi kraftur í góðu seyði. 

Kelpnúðlurnar eru mjög skemmtilegar núðlur sem gerðar eru úr þara. Þær eru orkusnauðar og hafa mjög góða og ferska áferð. Við notum kelpnúðlur í allskyns núðlurétti, t.d. í stirfry með satay sósu, eða í núðlur með pestó og grænmeti. Og kelpnúðlurnar passa einstaklega vel í svona ferska núðlusúpu.

Við áttum gulrætur og radísur sem okkur fannst tilvalið að skera í fallegar sneiðar í súpuna. Svo komumst við yfir svolítið rómaneskó sem er alveg sérlega fagur ættingi spergilkáls og blómkáls. Rómaneskó fæst stundum í grænmetisdeild stórmarkaðanna, en það má sem best nota spergilkál eða blómkál í skálina, ef rómaneskó er ekki til. Vorlaukur og ferskar kryddjurtir gefa súpunni mikið ferskt og gott bragð.

Þar sem seyðið, núðlurnar og allt grænmetið er frekar létt fannst okkur nauðsynlegt að hafa eitthvað djúsí til að bíta í, og avókadóið gegnir því lykilhlutverki hér. Það er mjúkt og kremað, alveg fullkomið í þessa núðlusúpuskál. Ekki spara avókadóið við þetta tilefni!

Hér er uppskriftin, njótið!

Uppskriftin

Fyrir tvo

Seyðið 
750ml vatn
1 msk miso
1 msk grænmetiskraftur
1 tsk sjávarsaltflögur
½ tsk thai curry paste
½ tsk hvítlaukur
¼ tsk fennelfræ
1 sítrónugrasstöngull
2 cm engiferrót í sneiðum
3 límónulauf (ef þið fáið þau)
1-2 döðlur, saxaðar
chili eftir smekk (bara fyrir þá sem vilja sterkari súpu)

  1. Setjið allt í pott, látið suðuna koma upp og látið malla við lágan hita í 20-30 mín.
  2. Bragðið til með sjávarsalti.


Í skálina

½ pk kelpnúðlur 
2 avókadó (1 í hvora skál)
nokkrar radísur 
2 dl rómaneskóbitar (eða spergilkál/blómkál)
1 gulrót í þunnum ræmum 
1 dl af ferskum söxuðum kryddjurtum (kóríander, minta og thaibasill) 
2-3 vorlaukar 
alls konar spírur

  1. Skerið grænmetið í passlega bita
  2. Fyrir þá sem vilja má léttsteikja rómaneskóið á pönnu, en þarf ekki
  3. Saxið kryddjurtinar
  4. Skerið avókadó í teninga
  5. Setjið nú kelpnúðlurnar í skálina ásamt grænmetinu og kryddjurtunum
  6. Hellið seyðinu yfir
  7. Skreytið með enn fleiri kryddjurtum og spírum
  8. Njótið!

comments powered by Disqus