6/8

Pavlóvur Alkemistans

Færsla skrifuð 6. ágúst 2015

Á fallegum sumardegi fyrir stuttu langaði okkur mæðgurnar að bjóða upp á skemmtilegan eftirrétt. Við áttum ný íslensk jarðaber og langaði í eitthvað sætt með þeim. Við ákváðum að útbúa litlar pavlóvur og bera þær fram með chili-jarðaberjum, dökku súkkulaði og kókosrjóma. Hvílíkt sælgæti!        ....en innhaldið kom gestunum á óvart.


Í ársbyrjun fór nýstárleg aðferð við að útbúa eggjalausan marengs eins og eldur í sinu um internetið.
Í staðinn fyrir að þeyta eggjahvítur er kjúklingabaunavatn þeytt á sama hátt!

Frakkinn Joël Roessel er sagður hafa uppgötvað þennan sérstaka eiginleika vökvans, stuttu síðar myndaðist samfélag áhugafólks um aðferðina á facebook þar sem tilraunagleðin fær að njóta sín og þeytt baunavatn (aquafaba) er notað í allskyns uppskriftir í staðinn fyrir eggjahvítur. 

Okkur finnst þetta alveg frábær nýting á hráefni sem annars færi að mestu til spillis. Við notum svo mikið af kjúklingabaunum, bæði í hummus, falafel, pottrétti og salöt. Forsoðnar baunir í krukku eru fljótleg leið til að gefa máltíðinni prótein og fyllingu svo við grípum mjög oft í þær. Okkur finnst því alveg ótrúleg gaman að hægt sé að nýta vatnið sem umlykur baunirnar í bakstur og sælgætisgerð. 



Þetta er eiginlega svolítil alkemía. Vatnið þeytist í hrærivélinni og umbreytist í stífa froðu, eins og fyrir töfra. 
Við notuðum vatnið af lífrænum kjúklingabaunum, lífrænan hrásykur og lífræna dropa til að gefa bragð.

Pavlóvur

safinn úr 1 krukku af lífrænum kjúklingabaunum
3 msk lífrænn hrásykur, malaður í kryddkvörn
1 tsk karamelludropar eða vanilla


Aðferð

  1. Setjið safann úr kjúklingabaununum í hrærivél og þeytið á hæsta hraða í 10 mín.
  2. Bætið hrásykrinum út í, 1 msk í einu og látið þeytast áfram á hæsta hraða í 5 mín í viðbót.
  3. Bætið nú bragðefninu út í og látið þeytast í 1 mín í viðbót.
  4. Hitið ofninn í 100°C. Látið bökunarpappír á ofnplötu. Setjið deigið í sprautupoka og sprautið litlum kökum þar á, passið að hafa bil á milli þar sem þær stækka í ofninum. 
  5. Bakið í 1 klst og lækkið þá hitann í 90°C og klárið að baka í 1-2 klst. Slökkvið á ofninum og látið standa í 1-2 klst eða þar til pavlóvurnar hafa kólnað. 

Chili - jarðaber

400g fersk íslensk jarðaber
2 msk lífrænn sítrónusafi
1 tsk sambal oelek eða annað gott chili


Aðferð

  1. Skerið jarðaberin í sneiðar og setjið í skál, hellið yfir sítrónusafa og sambal og blandið saman.
  2. Látið standa í 5-10 mín áður en borið fram. 







Bræðið 70% lífrænt súkkulaði og berið fram með kókosrjóma ef vill. Njótið í sumarblíðunni í góðum félagsskap!
comments powered by Disqus