13/1

Súkkulaðimús

Færsla skrifuð 13. janúar 2017

Nýlega helltist ákallandi löngun í gómsætt súkkulaði yfir okkur mæðgur. Við ákváðum að útbúa súkkulaðimús úr dökku lífrænu súkkulaði og aquafaba. Og viti menn, hún svalaði algjörlega súkkulaðiþörfinni og gott betur!

Aquafaba er baunasoð. Mjög óvæntur og heillandi eiginleiki baunasoðs uppgötvaðist fyrir nokkrum árum: þegar vökvinn er þeyttur í hrærivél umbreytist hann eins og fyrir töfra í stífa froðu sem minnir skuggalega mikið á þeyttar eggjahvítur. Frakkinn Joël Roessel er sagður hafa uppgötvað þennan sérstaka eiginleika baunasoðsins og stuttu síðar myndaðist samfélag áhugafólks um aquafaba á facebook þar sem aðferðin þróaðist áfram og nú er baunasoð þeytt í gríð og erg út um allan heim og notað í allskyns spennandi uppskriftir. 

Okkur finnst þetta alveg frábær nýting á hráefni sem annars færi til spillis. Sjálfar notum við mikið af kjúklingabaunum, bæði í hummus, falafel, pottrétti og salöt. Forsoðnar baunir í krukku eru fljótleg leið til að gefa prótein og fyllingu í máltíð svo við grípum mjög oft í þær. Okkur finnst því alveg ótrúleg gaman að hægt sé að nýta vatnið sem umlykur baunirnar í allskyns góðgæti. Áður höfum við útbúið pavlóvur og dásamlegt súkkulaðihúðað sælgæti og vegan majones úr aquafaba. 

Súkkulaðimúsin er létt og bragðgóð. Okkur fannst gott að bera músina fram með ferskum berjum og granateplakjörnum, til að fá eitthvað súrt og ferskt með sætri músinni. 

Súkkulaðimús

1 ½ dl vökvi af soðnum kjúklingabaunum (aquafaba)
¼ tsk cream of tartar
¼ tsk sjávarsaltflögur
1/8 tsk cayenne pipar
1 tsk vanilla
150g lífrænt dökkt súkkulaði, 71%

Aðferðin

  1. Setjið safann af kjúklingabaununum í hrærivél ásamt cream of tartar og salti og þeytið í 10 – 15 mín eða þar til þetta er orðið mjög stíft.
  2. Bætið cayenne pipar og vanillu út í og látið þeytast í 1 mín í viðbót.
  3. Á meðan þetta er að þeytast, bræðið súkkulaðið yfir vatnsbaði. Okkur finnst best að saxa súkkulaðið frekar fínt niður og hafa hitann á vatnsbaðinu ekki of háan.
  4. Þegar súkkulaðið er bráðið hellið því yfir í aðra skál og látið kólna án þess að stífna.
  5. Þá er komið að því að blanda þeytta baunasafanum saman við súkkulaðið. Galdurinn er að gera það mjög varlega með fáum hreyfingum til að loftið fari ekki úr þeytta baunasafanum. Við notum sleikju og veltum þeyttum baunasafanum varlega út í súkkulaðið. Það er gott að byrja að blanda helmingnum út í, þá eru meiri líkur á að loftið haldist í og útkoman verði góð.
  6. Setjið inn í ísskáp og látið stífna. Tekur um 2 klst.
  7. Mjög gott að bera fram með ferskum berjum og ávöxtum. 

Njótið!

comments powered by Disqus